Përmbajtja


Temat e librit metodik online mbi BE:

Hyrje

Rëndësia e BE

Çfarë është BE?

Zhvillimi i BE

Institucionet e BE

Kërkimet në internet rreth BE
 

Probleme në përçimin e BE

Kompleksiteti i sistemit të BE është me siguri një arsye kyçe, pse është kaq i vështirë përçimi i BE. Por ka edhe probleme të tjera:

BE ndryshon vazhdimisht. Sa arrijmë të informohemi rreth ndryshimeve kontraktuale, vendeve në parlament dhe ponderimit të votave në Këshillin e BE, ka ndryshuar sërish çdo gjë. Libri im metodik në fakt sapo është botuar, por ja që nuk është më aktual.

BE është delja e zezë. Të gjitha vendimet e papëlqyeshme i atribuohen BE. Por që në këtë proces vendimmarrjeje kanë marrë pjesë të gjitha shtetet anëtare me qeveritë e tyre, kjo anashkalohet. Ndaj BE ka një imazh të keq. E kush nuk i njeh të gjitha legjendat e paragjykimet për "ata të Brukselit".

BE është krejt ndryshe nga gjithçka tjetër, që ne njohim. Nuk e fusim dot në ndonjë nga sirtarët tanë. Nuk e vendosim dot në një kategori të njohur për ne. Ai nuk është as një organizatë ndërkombëtare "normale", as nuk funksionon si sistemi ynë politik kombëtar.

Thelbi dhe struktura

Këto probleme në përçim formojnë sfondin, i cili bën të dallueshëm thelbin e këtij kompleksi tematik. Në qendër gjejmë problemin, se si të përçojmë një ide bazë dhe të pavarur rreth BE, që do të ndihmojë jo vetëm për të kuptuar zhvillimin e deritanishëm të BE, por, krahas kësaj, edhe të kategorizojmë dhe vlerësojmë eventet e ardhshme.

Për ne, shprehimisht, nuk është e rëndësishme të bëjmë një hyrje të plotë në objektin tepër kompleks të BE. Kjo nuk do të mund të realizohej në kuadër të këtij libri metodik online. Ne kemi përzgjedhur në mënyrë të vetëdijshme pesë dimensionet e mëposhtme:

Kapitulli 1 i kushtohet rëndësisë së BE, që zor se mund të mbivlerësohet. Kjo vlen, natyrisht dhe para së gjithash, për qytetarët e BE - por jo vetëm për ata. Për shkencën politike bëhet fjalë për një temë veçanërisht sugjestionuese. Ajo merret me BE si një laborator për global governance. Ky kapitull, ndër të tjera, sjell në vëmendje edhe kërkesat e veçanta që duhen plotësuar, në rast se duam të merremi me BE.

Kapitulli 2 shtron pyetjen në dukje të thjeshtë: çfarë është BE? Dhe tregohet, që në fakt është e vështirë të gjendet një përgjigje, nëse fiksohemi pas modeleve të vjetra të politikës. Në rastin e BE kemi nevojë për një model të ri, i cili është një sistem disanivelesh.

Kapitulli 3 analizon zhvillimin e BE. Kushti paraprak për të krijuar një gjykim të pavarur në rastin BE në ndryshim të vazhdueshëm është të pasurit e një perspektive afatgjatë. Sepse vetëm kështu bëhen të dallueshëm faktorët determinantë më të rëndësishëm, që ndihmojnë në shpjegimin e progreseve dhe krizave të së shkuarës, sikurse edhe ato të së tashmes e së ardhmes. Ky kapitull përmbyllet me një vështrim përmbledhës rreth risive, që solli Traktati i Lisbonës, hyrë në fuqi më 1 dhjetor 2009.

Kapitulli 4 hedh dritë mbi sistemin e vendimmarrjes në BE. Këtu prezantohen shkurtimisht organet kryesore: Komisioni Evropian, Këshilli i BE ("Këshilli i Ministrave"), Parlamenti Evropian (PE), Këshilli Evropian dhe Gjykata Evropiane. Por do të bëhet fjalë edhe për nivele të tjera të sistemit disanivelesh të BE si dhe për mënyrën se si ndërveprojnë institucionet e BE në kuadër të "procedurës së rregullt ligjvënëse".

Kapitulli 5 trajton problemin e përçimit, me fjalë të tjera, që çdo gjë që shkruhet rreth BE, vjetërohet shpejt. Kush kërkon të mbetet i aktualizuar, duhet t'i referohet vazhdimisht internetit. Ky kurs bazë ofron një hyrje komplete në kërkimin profesional në internet rreth temës së BE. Teknikat e përshkruara aty, natyrisht, mund të përdoren me sukses edhe për çdo temë tjetër.

Sikurse në të gjitha komplekset tematike të  D@dalos edhe këtu do të gjeni një listë përmbajtje me linke direkte për të gjitha faqet e këtij libri metodik online.

Sfondin e këtij libri metodik online e përbën fakti, që njohuritë rreth BE janë shumë prapa në krahasim me domethënien e tyre praktike për pothuaj të gjithë sektorët në Evropë. Vetëm duke e kuptuar që në themel këtë organizatë komplekse mund të krijohet një gjykim i mirëargumentuar duke lënë mënjanë paragjykimet dhe legjendat e ditës. Në këtë drejtim ne duam të japim kontributin tonë.

... shko më tej te Kapitulli 1: Rëndësia e BE...

-----------------------------------------------

Falënderojmë Komisionin Evropian, nga "Audiovisual Library" e të cilit kemi marrë disa prej fotografive të përdorura këtu:  http://www.europa.eu.int/comm/mediatheque/index_en.html


[© Teksti dhe grafikët: Shoqëria Agora]
 

© 1998-2010 D@dalos - Edukimi politik, Edukimi me parimet e demokracisë, Edukimi me të drejtat e njeriut, Pedagogjia e paqes (Projekt i Pharos e.V.), Web: Agora